Апатқа ұшырап, I топтағы мүгедек болды: сот жұмысшыға артылған кінәні алып тастады

Сот жұмысшының кінәсі дәлелденбегенін және қауіпсіз еңбек жағдайларын қамтамасыз ету жұмыс берушінің міндеті екенін атап өтті.

Оқиға электр беру желісіндегі апатты жою және қалпына келтіру жұмыстары кезінде болған. Электр монтері бригада құрамында жұмыс істеп жатқанда желіге кернеу беріліп, жазатайым оқиға тіркелген. Соның салдарынан жұмысшы ауыр жарақат алып, кейін оған I топтағы мүгедектік белгіленген.

Арнайы тергеп-тексеру комиссиясы оқиғаға жұмыс берушіні 70%, ал жұмысшыны 30% кінәлі деп таныған. Алайда зардап шегуші бұл шешіммен келіспей, сотқа жүгінген. Оның айтуынша, қажетті қауіпсіздік шаралары сақталған, ал қауіпсіз еңбек жағдайларын қамтамасыз ету жұмыс берушінің міндетіне жатады.

Бірінші сатыдағы сот жұмысшының әрекетінен өрескел абайсыздық белгілерін байқап, талап арызды қанағаттандырудан бас тартқан.

Алайда апелляциялық сот істің мән-жайын қайта қарап, өзге қорытындыға келді. Сот бригаданың жұмыс жүргізуіне рұқсат берілгенін, ал жерге тұйықтау құрылғысы желіде кернеудің жоқтығы тексерілгеннен кейін орнатылғанын анықтады.

Соттың пікірінше, жұмысты ұйымдастыру және олардың қауіпсіз жүргізілуіне жауапкершілік жұмыс берушінің уәкілетті тұлғаларына жүктеледі. Сонымен қатар комиссия электр монтерінің әрекетінен өрескел абайсыздық болғанын және оның әрекеті мен жазатайым оқиғаның салдары арасында себеп-салдарлық байланыс бар екенін дәлелдей алмаған.

Сот жазатайым оқиға жұмыс берушінің қауіпсіз еңбек жағдайларын тиісті деңгейде ұйымдастырмауынан болған деген қорытындыға келді. Атап айтқанда, жұмыс жүргізіліп жатқан кезде электр желісіне кернеу берілуіне жол бермеу шаралары қабылданбаған.

Нәтижесінде Қарағанды облыстық соты жұмысшының талабын қанағаттандырып, арнайы тергеп-тексеру актісінен оның 30% кінәсі туралы қорытындыны алып тастады.

Сот актісі заңды күшіне енді.