Оқушы қызды зорлап, өлтіремін деп қорқытқан: Ақтөбеде қыздың тағдыры сотта қаралды
Ақтөбеде кәмелетке толмаған қызды бала кезінен танитын көршісі зорлаған, деп хабарлайды ZTB.
Қызды қылмыс туралы ешкімге айтпа деп қорқытқан ер адам 15 жылға бас бостандығынан айырылды. Алайда жәбірленуші полицияға арызданғаннан кейін әлеуметтік желіде де қудалауға ұшыраған.
OpenNews мәліметінше, оқиға 19 мамырда болған. Жәбірленуші құрбысымен серуендеп, кейін оның үйіне барған. Сол жерде құрбысының ағасы қызға күш қолданып, зорлаған. Олар бір-бірін жақсы танығандықтан, қыз күдіктіні бала кезінен білетін болған.
Жәбірленушінің әпкесі Ақмарал Әжіғалиеваның айтуынша, ер адам қызды өлтіремін деп қорқытқан. Сондықтан ол бір ай бойы болған оқиға туралы ешкімге айтпаған. Қыздың психологиялық жағдайы нашарлап, қатты күйзеліске түскен.
«Айтсаң, өлтіремін, зорлағаным үшін емес, өлім үшін отырамын», — деп қорқытқанын жәбірленушінің әпкесі жеткізген.
Оның сөзінше, қылмыстық істі тергеу бес айға созылған. Ақыры сот ер адамды 15 жылға бас бостандығынан айырған.
Жәбірленуші әлеуметтік желіде де қудалауға ұшыраған
Оқиға полицияға жеткеннен кейін қыздың басындағы қиындықтар мұнымен аяқталмаған. Туыстарының айтуынша, әлеуметтік желідегі кейбір парақшаларда оның суреттері жарияланып, қыз интернет арқылы қудалауға тап болған. Жәбірленушінің жақындары блогерлердің бірінің үстінен бөлек арыз түсірген.
Ақтөбе облысының қылмыстық істер жөніндегі мамандандырылған ауданаралық соты істі жабық режимде қараған. 22 жастағы ер адам Қылмыстық кодекстің кәмелетке толмаған адамға қатысты зорлау туралы бабы бойынша кінәлі деп танылды.
Сотталушы тағылған айыпты мойындамаған. Алайда сот оның кінәсін жәбірленуші мен куәлардың жауаптары, сараптама қорытындылары және заттай дәлелдер растағанын ескерген.
Сот үкімімен ер адам 15 жылға бас бостандығынан айырылды.
Қазір жәбірленуші психолог көмегіне жүгініп, оңалту курсынан өтіп жатыр. Оқиғадан кейін ол мектептен кетуге мәжбүр болған. Қазір колледжде білім алып жүр.
