Ақтөбеде неке сарайында бұрынғы күйеуі пышақтап өлтірген әйелге қатысты жаңа деректер
Ақтөбеде неке сарайында пышақталып өлтірілген 26 жастағы әйелдің артында төрт баласы қалды. Марқұм көпбалалы ана болған.
Қайғылы оқиғаның жаңа деректері анықталды.
Оның екі баласы күдіктімен азаматтық некеде болған кезде дүниеге келген. Алдын ала мәлімет бойынша, бұрын бірге тұрған ерлі-зайыпты арасындағы жанжал ата-ана құқығынан бас тарту мәселесіне байланысты туындаған.
Полиция дерегінше, жанжал неке сарайы ғимаратында болған. Қарым-қатынастары тоқтаған бұрынғы бірге тұрған жұптың арасындағы келіспеушілік соңы қайғылы жағдайға ұласқан.
Оқиғадан кейін марқұмның кәмелетке толмаған екі баласы уақытша «Үміт» мамандандырылған сәбилер үйіне орналастырылған. Қалған екі баланың кімнің қамқорлығында болатыны әзірге ресми түрде хабарланған жоқ.
Ақтөбе облыстық балалардың құқықтарын қорғау басқармасының басшысы Амангелді Қонақбаевтың айтуынша, балалардың алдағы тағдыры олардың құқықтары мен заңды мүдделерін ескере отырып шешіледі. Қазір жағдай басқарма мен тиісті мемлекеттік органдардың бақылауында.
Қайғылы оқиға 2026 жылғы 3 қарашада болған. 26 жастағы әйел неке сарайында пышақ жарақатынан көз жұмды. Белгілі болғандай, марқұм жаңадан отбасын құрып, некесін тіркеуге келген. Алайда ғимарат ішінде бұрынғы азаматтық некедегі күйеуімен арада жанжал туындаған.
Кейбір ақпарат құралдарының хабарлауынша, олар шамамен үш жыл бірге тұрған. Күдікті оқиға орнында ұсталып, уақытша ұстау изоляторына қамалды.
Аталған дерек бойынша адам өлтіру бабы бойынша қылмыстық іс қозғалған. Қазір тергеу амалдары жалғасып жатыр. Оқиғаның барлық мән-жайы мен нақты себептері тергеу барысында анықталуы тиіс.
