Алматының Медеу ауданында көлік қозғалысы уақытша шектеледі
31 қазан мен 7 қараша аралығында Алматының Медеу ауданында электр желісінде апаттық-қалпына келтіру жұмыстары жүргізіледі, деп хабарлайды ZTB.KZ
Осыған байланысты көлік қозғалысына уақытша шектеу қойылады.
Шектеу Ұлар көшесінен Ладушкин көшесімен қиылысатын учаскеге дейінгі аралықты қамтиды. Жөндеу жұмыстары Ладушкин көшесіндегі № 125 үйдің маңында жүргізіледі. Бұл жерде зақымданған кабель жолдың астында орналасқан.
Компанияның түсіндіруінше, аталған желі Алматының электрмен жабдықтау жүйесіндегі айналма желі құрамына кіреді. Ол «Ерменсай» және «Бесағаш» қосалқы станцияларын байланыстырады. Кабельдің зақымдануына байланысты желі уақытша ашық схема бойынша жұмыс істеп тұр. Бұл электр жүйесінің басқа элементтеріне түсетін жүктемені арттырады.
Ақауды жою үшін мамандар жол жабыны мен бетон науаны ашып, зақымданған учаскеге қол жеткізуі керек. Одан кейін жөндеу жұмыстары жүргізіліп, желінің жұмысын қайта қалпына келтірмес бұрын қажетті сынақтар өткізіледі.
Апаттық-қалпына келтіру жұмыстары тәулік бойы жүргізіледі. Жұмыс аяқталғаннан кейін жол жабыны толық қалпына келтіріледі.
«Алатау Жарық Компаниясы» АҚ жүргізушілерден бағыттарын жоспарлау кезінде уақытша шектеулерді ескеруді сұрады. Жөндеу жұмыстары қала мен Алматы агломерациясының электрмен жабдықтау жүйесін қалыпты схемаға қайтару үшін қажет.
