«Premier» тұрғын үй кешені дауы: журналист Вадим Борейконың ісі сотта қаралды
Алматы қаласының Бостандық аудандық сотында «Etude-Ybyrai» құрылыс компаниясының қазақстандық журналист, «Гиперборей» Вадим Борейкоға қарсы талап-арызы бойынша сот жарыссөзі өтті.
Басылымның мәліметінше, журналистің адвокаттары соттағы жарыссөз өтетіні туралы алдын ала хабардар болмаған.
Борейконың қорғаушылары соттан компанияның талап-арызын толықтай қанағаттандырудан бас тартуды сұрады. Ал талапкер тарап ақпаратты теріске шығарып, журналистен келтірілген шығынды өндіріп алуды талап етіп отыр.
Қорғау тарабының негізгі уәждерінің бірі — Борейко өз жарияланымдарында мемлекеттік органдар өкілдерінің ресми мәлімдемелеріне сүйенгені. Сонымен қатар адвокаттар «Premier» тұрғын үй кешенінің бас мердігері — «Seven Stroi Development» ЖШС-нің 2025 жылғы 15 қазан мен 2026 жылғы 19 қаңтар аралығында құрылыс жұмыстарын жүргізуге арналған лицензиясы болмағанын алға тартты.
Бұдан бөлек, қорғаушылар сот сараптамасына негіз болған нотариалды хаттамалардың дұрыстығына күмән келтірді. Олардың пікірінше, хаттамалардағы мәліметтер бейнематериалдардың мазмұнына сәйкес келмейді.
Сондай-ақ адвокат «Premier» тұрғын үй кешенінің құрылысына қатысты мәселелерді басқа да бұқаралық ақпарат құралдары жазғанын, алайда сотқа тек Вадим Борейконың ғана тартылғанын атап өтті.
Судья іс бойынша шешім 12 қарашада жарияланатынын хабарлады.
