АҚШ уәдесінде тұрмады: Таяу Шығыс мәселесі шешілер емес
АҚШ уәдесінде тұрмай, Конгреске аралық сайлау қарсаңында Иранға соққы жасады, деп хабарлайды ZTB.
Америкалық шенеуніктердің айтуынша, бұл әрекет Иран Ислам революциясы сақшылар корпусының (ИРСК) АҚШ ұшағына оқ атуына жауап ретінде жүзеге асырылған. Соққылар Иранға тиесілі Кешм аралына бағытталған. Бұл туралы CBS News үш америкалық шенеунікке сілтеме жасап хабарлады.
АҚШ президенті Дональд Трамп дүйсенбі күні ғана Иранның келісімге келуге ниетті екенін және мәселе жақын арада шешілуі мүмкін екенін мәлімдеген еді. Алайда арада көп уақыт өтпей, америкалық әскерилер Иран аумағындағы нысандарға шабуыл жасады.
Жасалған соққылар туралы алғашқылардың бірі болып The Wall Street Journal басылымы хабарлаған.
Әскери операция АҚШ Конгресіне аралық сайлау қарсаңында болды. Ал Дональд Трамп сайлаудан кейін Иранға қарсы әскери әрекеттерді қайта жандандыру мүмкіндігін қарастырып жатыр. Сонымен қатар АҚШ пен Катардың делдалдары Вашингтон мен Тегеран арасында келісімге келу жөнінде келіссөздер жүргізуде.
Трамптың мәлімдемелері әдеттегідей бір-біріне қарама-қайшы
Иранмен соғыс тоғызыншы айға аяқ басқан тұста Дональд Трамптың мәлімдемелері де әдеттегідей құбылып тұр. Бірде ол дипломатиялық келісімге қол жеткізуге мүмкіндік барын айтса, енді бірде Иранға ауқымды әскери соққылар жасау қажеттігін алға тартады.
Дүйсенбі күні таңертең Truth Social әлеуметтік желісіндегі парақшасында АҚШ президенті келісімге қол жеткізу мүмкін екенін және Иранның мәселені мүмкіндігінше тезірек реттеуге мүдделі екенін жазған.
Алайда сол күні кешке Fox News телеарнасына берген сұхбатында Трамп Ирандағы бірнеше нысанды, соның ішінде ядролық нысан орналасуы мүмкін деп болжанатын Пикакс тауын да залалсыздандыру қажеттігін мәлімдеген.
Журналист Шон Хэннитидің бағдарламасына қатысқан президент мұндай операцияны жүзеге асыру қиын емес екенін, тіпті оған бір сағаттай уақыт жеткілікті болуы мүмкін екенін айтқан.
Нетаньяху Иранға соққыларды жалғастыруды ұсынған
Associated Press агенттігінің хабарлауынша, Израиль премьер-министрі Биньямин Нетаньяху демалыс күндері Дональд Трамппен телефон арқылы сөйлесіп, Иранға қарсы ауқымды әскери соққыларды жалғастыруға шақырған.
Трамп Израиль үкіметінің басшысымен телефон арқылы сөйлескенін растағанымен, әңгіме барысында нақты қандай мәселелер талқыланғанын ашып айтпады. Ол келіссөзді «өте жақсы әңгіме» деп сипаттаған.
Осылайша, Вашингтон бір жағынан Тегеранмен келісімге келу мүмкіндігін қарастырып жатқанын мәлімдесе, екінші жағынан Иран аумағындағы әскери операцияларын жалғастырып отыр. АҚШ пен Иран арасындағы қақтығыстың алдағы уақытта қалай өрбитіні және дипломатиялық келіссөздердің нәтижесі әзірге белгісіз.
Соғыс АҚШ-тағы аралық сайлауға да, Израильдегі парламент сайлауына да айтарлықтай ықпал етті. АҚШ-та Ормуз бұғазының жабылуына байланысты шығындардың өсуі Дональд Трамп пен Республикалық партияның қоғамдық қолдауынан күрт айырылуына себеп болды.
Ал Израильде Нетаньяху партиясы 2023 жылғы 7 қазандағы оқиғалардан кейін өткен алғашқы парламент сайлауында көпшілік қолдауынан айырылды.
CBS News қолына түскен АҚШ Орталық қолбасшылығының жаңа бағалауына сәйкес, қазан айының ортасына қарай Иранмен соғыстың америкалық әскерилерге келтірген шығыны кемінде 47,1 миллиард долларға жеткен.
Заң шығарушыларға ұсынылған соңғы есеп бойынша, АҚШ Орталық қолбасшылығы тек пайдаланылып болған оқ-дәрілердің орнын толтыруға шамамен 29 миллиард доллар қажет екенін мәлімдеген. Бұған қоса, жоғалған әскери техниканы алмастыруға 6,1 миллиард доллар, ал америкалық әскери қызметшілерді қамтамасыз ету сияқты қосымша шығындарға шамамен 11,9 миллиард доллар жұмсалған.
