Атырауда 13 жастағы оқушы қызды өлтіруге оқталған жасөспірім 15 жылға сотталды
Қайғылы оқиға наурыз айында Қонаев атындағы BINOM мектебінде болған.
Іс материалдарына сәйкес, жасөспірім шабуылға бірнеше күн бойы дайындалған. Ол соңғы сабақтан кейін үйіне кетіп, сөмкесіне пышақ пен балға салып, қайтадан мектепке оралған. Күзетшіге көзілдірігін ұмытып кеткенін айтып, мектепке кірген.
Дәлізде бір топ оқушыны көрген ол қыздардың бірінің соңынан қуып жетіп, арқасы мен мойнына бес рет пышақ сұққан. Жасөспірім мен зардап шеккен қыз бір-бірін танымайтын болған.
Жараланған оқушы шұғыл түрде ауруханаға жеткізілді. Дәрігерлердің арқасында оның өмірін сақтап қалу мүмкін болды.
Сот отырысында жасөспірімнің ата-анасын өлтіру туралы ойларын жазып жүрген дәптері болғаны белгілі болды. Сондай-ақ ол терроризмге қатысты материалдарға қызығушылық танытқан.
Бұған дейін жасөспірім буллингке байланысты психологтың көмегіне жүгінген. Алайда физикалық зорлық-зомбылық фактілері расталмаған.
