KZ
RU KZ

Тоқаев мемлекеттік компаниялардағы жемқорлыққа қатысты пікір білдірді

Мемлекет басшысы Қасым-Жомарт Тоқаев Қауіпсіздік Кеңесінің шұғыл отырысында елдегі жауапты мемлекеттік компания басшыларының ұсталуына байланысты мәлімдеме жасады

Қасым-Жомарт Тоқаев
Қасым-Жомарт Тоқаев Фото: Ақорда

Мемлекет басшысы Қасым-Жомарт Тоқаев «Самұрық-Қазына» қоры мен «Қазақстан темір жолы» компаниясы басшыларының ұсталуына байланысты мемлекеттік компаниялардағы сыбайлас жемқорлық мәселесін көтерді. Президенттің айтуынша, бұл жағдай квазимемлекеттік сектордағы жемқорлықтың әлі де күрделі мәселе екенін көрсетеді.

Тоқаев тергеу жұмыстары енді басталғанын еске салып, оның барысына қатысты заң талаптарын сақтаудың маңызын атап өтті. Сонымен қатар Конституцияны құрметтемей, оның негізгі қағидаларын елемейтіндер «Заң мен Тәртіп» қағидатына сәйкес жауапқа тартылатынын айтты.

Президенттің мәліметінше, 2023–2025 жылдар аралығында Қазақстанда 3 168 сыбайлас жемқорлық құқықбұзушылығы анықталған. Оның 2 165-ін мемлекеттік қызметшілер жасаған. Ал биылғы жылдың алғашқы он айында 751 құқықбұзушылық тіркеліп, оның 546-сына мемлекеттік қызметшілердің қатысы болған.

Мемлекет басшысы жемқорлықпен күресте ешкімге артықшылық берілмейтінін, лауазымына, туыстық байланысына немесе қызметтік мәртебесіне қарамастан, заң алдында барлығы бірдей жауап беретінін ескертті. Ол Ұлттық қауіпсіздік комитетінің Сыбайлас жемқорлыққа қарсы іс-қимыл жөніндегі қызметіне Бас прокуратурамен бірлесіп, жоғары лауазымды тұлғалардың заңсыз әрекеттерін мұқият тексеруді тапсырғанын жеткізді.

Сондай-ақ Тоқаев мемлекеттік компаниялардағы жемқорлық тәуекелдерін азайту және олардың жұмыс сапасын жақсарту қажеттігін айтты. Осыған байланысты Үкімет пен бақылаушы органдарға 24 қарашаға дейін квазимемлекеттік сектордағы сыбайлас жемқорлық құқықбұзушылықтарын барынша азайту жөнінде нақты ұсыныстар әзірлеуді тапсырды.

Касым-Жомарт Токаев Фото: Акорда

Президент «Самұрық-Қазына» қоры мен «Қазақстан темір жолы» компаниясының жұмысы басшылардың ұсталуына қарамастан тоқтамайтынын атап өтті. Оның пікірінше, жемқорлыққа қарсы күрес мемлекеттік компаниялардың ашықтығын арттырып, инвесторлар мен халықаралық қаржы институттарының сенімін нығайтуы керек.

Тоқаев заңсыз иемденген активтерді қайтару жұмыстарына да тоқталды. Оның айтуынша, мемлекетке жалпы 1,3 триллион теңгеден асатын актив қайтарылған. Бұл қаражатқа 466 әлеуметтік және инфрақұрылымдық нысан салу жоспарланған. Қазіргі уақытта олардың 383-і, соның ішінде мектептер, медициналық мекемелер, спорт кешендері мен сумен жабдықтау желілері пайдалануға берілген.

Бұдан бөлек, мемлекет басшысы «Халықтық құрылыс» бағдарламасы аясында салынатын нысандардың сапасына ерекше назар аударуды тапсырды. Оның айтуынша, жолдар, әуежайлар, емханалар, оңалту орталықтары, мектептер мен спорт кешендері белгіленген талаптарға сай салынуы керек.

Мемлекет қаржысының тиімді жұмсалуын бақылау үшін арнайы мемлекеттік комиссия құрылады. Оның құрамы келесі аптаның басында жарияланатыны айтылды.

Материалмен бөлісу
Біз cookie файлдарын қолданамыз
Cookie файлдары сайтты жақсартуға және трафикті талдауға көмектеседі. Толығырақ — Құпиялылық саясатында.